今天是坐車的好日子

星期六晚去咗中山古鎮，係拱北打的。上車前已問司機識唔識路，佢好快咁答識，於是即彈上車。原本應該個多小時就到，因珠海整緊輕鐵，周圍整路開唔得快。八點上車，差不多十時才到中山。點知個司機係大路停車，跑過隔離架士。我以為佢同朋友傾計，點知再過一個燈位，又停車。今次仲正，佢直接開咗停係我地隔離架大貨車度門，傾咗兩句。然後，佢上返車，仲笑笑口話應該轉左。我忍唔住問佢，上次幾時去過古鎮！點知佢居然答我：四年前去過一次，估唔到啲路變咗咁多。（普通話）xyz@><*##!!! 終於，十時四十分到達古鎮既一間酒店。大半個小時前已叫佢搵摩托車帶路，都攪咗半個鐘先，最後比咗五蚊，由摩托車帶路，唔駛十分鐘到。中國人！好嘢！

星期日，參觀了幾間廠同鋪，又大魚大肉食個Lunch。嘆埋杯咖啡，未到三點。係國貿搵架車（唔係的士，係因為果度係一架的士都無），倾好價上車。阿司機好鬼多野講，而我又習慣係大陸一個人坐車，一定會同司機傾計。心諗安全啲掛！點知傾傾下，原來司機係同我同年同月生，大我十多天。哈哈！唔怪得咁多嘢講！

我地係度乜都講，佢鄉下係江西，好窮。果個年代，大鑊飯。無勞動無飯食，過年才有幾片肉。平時連米都無得落肚。大了出城市工作，揸摩托車，幾蚊幾毫咁儲錢。後來，經濟好。外資多，佢係韓資公司做司機。幾年前，經濟差咗，外資跑了。二百多間韓資企業，淨返幾十間。外資跑了，被拖數既本地公司被連累，唉！咁多年，佢儲蓄了十萬元。希望搵多的，攞去投資採煤。點知三年來未賺過一毫。上年問銀行貸款五萬，買咗哩部車，做個小小老闆，走港澳客。點知珠海中山今年年底輕鐵開，到時又平又快，無人會坐白牌車。但佢仍然笑住講，再走其他，勤勤力力，唔好貪心，養老婆仔女都可以。

佢個大女十九歲，細仔都十三，係江西家鄉。佢老家而家好好多，國家錢多了，人民生活也好了。如果以前唔係有咁多貪官，而家會仲好。不過，有人就有貪，改變唔到。而家，國家一捉貪官，佢一定走唔到，要殺一警百，如果唔係人人都貪，平民百姓就會反喇。所以，而家國家福利好了很多，起碼比到飯食先，其他的再講喇！佢老婆大佢一個月，從小玩大，而家同佢一齊係中山。個女出年考大學，考不到就要出來搵工做。不過，而家既細路好幸福，未捱過苦，到工廠打工怕受不了。佢地要做但又要玩，工廠平常都要九個鐘，但正常工時賺不到錢，加班才賺多。但加班了又累又無哂時間。唉！難怪咁多後生入咗大廠做，頂唔住而輕生！

傾傾下，到了拱北。佢突然講，早知過來，就叫埋老婆。佢老婆係內陸成長，未見個大海，哩度咁靚，佢一定好開心。唔覺唔覺，一個小時十五分鐘，落車。交換電話，下次再見面。（全程我係用我果的所謂普通話同司機交流，溝通到都幾好笑）

今天是搭船好日子

澳門船到上環，嘆咗個下午茶，真係係茶樓嘆果隻。傾傾吓去藝術館，本來想到天星搭船，但係截到架過海的，就咁就彈左去尖沙咀。遊咗一輪，抽住一大袋書，行去碼頭撘船。果陣真係想跳上的士就算！不過，上到船又睇到小小咸旦黃，又有啲啲風吹吹吓，拋吓拋吓...真係好耐無搭渡輪橫過維港！靜靜地，唔趕時間，吹吹吓...好多畫面，係我個腦既維港拋拋吓！拋下拋下...一堆堆圖畫，一堆堆數字，一堆堆聲音，一堆堆人群...拋下拋下，唔覺唔覺就過咗灣仔。夾小的碼頭，擠滿人群...哩個碼頭，好似廿一年都無變過。唔似中環果個，面目全非，越走越遠。踏上同一條樓梯，一條臨時咗好耐既樓梯，擦過人群，回望維港，心裡一句「我仍然係度！」。「我仍然係度」！因為我有當日既氣息，無激情，無張狂，無喊叫，只係將一切看在眼內，影像連同氣味見証住當年今日。中環天星碼頭冷酷地搬家遠去，灣仔碼頭靜止般留戀昨日，維港兩岸依然潮漲潮退，而我...仍然係度，成為記載住歷史既其中一個字，當中一劃。

靜靜地，係度...就係度，係呢一個字度，堅持緊守完成這個字的任務。係度等待！